蘭桂坊淪毒妖域 除魔唯靠孫大聖
太一叮細個睇大話西遊，唐三藏取西經就係一段斬妖除魔之旅，白骨精、雉雞精、蜘蛛精、青蛇精，真正乜鬼都有。嗱，今時今日，香港都有一條滿布邪魔外道嘅奇幻之路o架，邊度？咪就係中環蘭桂坊囉。呢個國際著名旅遊景點近年已經淪為聯合國犯罪基地，烏煙瘴氣，藏污納垢，簡直係生人勿近嘅人間妖域。
用妖域嚟形容蘭桂坊，絕對無誇張o架。呢個夜蒲熱點唔止係旅客尋歡作樂之地，更加係毒販必爭之地，搖頭丸、K仔、可卡因賣到成行成市，直頭攞正牌一樣，而盤據搵食嘅除咗本地薑之外，近年仲有非洲幫、南亞黨、半唐番同鬼妹仔等惡勢力插旗爭食，猶如「五鬼出洞」，問你怕未？當然啦，老蘭除咗係販毒天堂，亦係淫亂樂園，喺呢度迷姦水好賣過礦泉水，環肥燕瘦當街兜客，而迷幻男女嘅街頭春宮騷更加係晚晚上演添，套用近期一套港產片戲名，好多大滾友落老蘭真係一心為咗「取西經」o架！
好好一個特色旅遊景點，居然變成特黑罪惡窩點，呢啲咪叫自己砸爛自己塊招牌囉。外國遊客慕名而來，一睇，發現所謂「蘭桂騰芳」嘅旅遊勝地，原來只係爛鬼搵食嘅九反之地，傳出去都丟架啦。以前老蘭被人笑「猛鬼」，因為多俗稱「鬼佬」嘅外國人聚腳，成為香港華洋雜處嘅國際都會閃耀招牌，估唔到今時今日，猛鬼就猛鬼嘞，不過最生猛嘅係作奸犯科嘅牛鬼蛇神，咁搞法，遲早搞臭香港旅遊之都個名嘅咋。
講到呢度，太一叮又係時候訪問吓警方，幾時至肯犂庭掃穴整頓老蘭呀？幾時至肯嚴正執法打擊罪惡呀？警方執法不力，搞到旅遊景點變罪惡淵藪，唔怪得威望低落到被女老師用粗口辱罵啦。
唉，蘭桂坊淪為妖域，講到尾就係當局一手造成。一來警方疏於執法，搞到「五鬼出洞」肆無忌憚，二來咯喎，港府嘅政治難民政策千瘡百孔，亦係搞到老蘭藏污納垢嘅成因。呢，以日趨坐大嘅非洲幫同南亞黨為例吖，呢班老蘭新貴其實唔少都以酷刑聲請留港，匿藏老蘭搵食，有人打黑工，有人做夜場打手，有人販毒，搞到呢個夜蒲熱點更加烏煙瘴氣。
正所謂，金猴奮起千鈞棒，玉宇澄清萬里埃。西遊記裏面嘅妖怪詭計多端，一樣逃唔過齊天大聖嘅金睛火眼，避唔過佢嘅金箍棒，最終被打得七零八落，睇嚟要將蘭桂坊呢個妖域變番淨土，唔靠孫大聖出手都唔得嘞，叮！
