SUN搞作：打橫嚟講：亞視衰敗之原因
香港特區內的亞洲電視台投資者王征聲稱呢幾年耗資咗十幾億港幣；另外，那個高喊願為亞視犧牲的盛小朋友又說佢嘅家族喺呢四年用咗十六億。嘩吓！唔到四年，用咗三十億？嗱！唔知上述兩人有無吹水作大報假案，抑或兩筆款項其實是同一單嘢？即使，只係十六億，但只玩咗四年，那豈不是每日燒銀紙一百萬？
用咗十幾億投資去做一件事，瞌埋雙眼亂舞，其回報也應不錯吧！點知，王征同盛小朋友卻弄得聲名狼藉，夾尾而逃！
好端端，有十多億喺手，於亞視健全的基礎設施和有不弱的人才下，每日一百萬，是何等充裕呢？當年，孤寒若邱德根時期，亞視一樣可有經典的製作傳世，現王盛年代，卻只留下污名。
亞視之死，究竟係衰咗啲乜嘢呢？一個字：「狗」！
王征主政的亞視，花全力只為搞「討好」阿爺，而非用心去做好一個電視台。香港人的忍耐力其實很強，只要啲節目內容未去到令人作嘔，起碼，會有番一兩點收視。
在今天，香港人厭倦政治的時刻，亞視只要多一兩個講插花、炒餸、風水和飲食的無聊節目，也可打倒TVB電視霸權的，奈何！亞視愛扮「狗奴才」，搵埋啲唔入流嘅低質政評人噏啲劣質反智言論，以為咁樣可以逗阿爺歡心。
唉！反令阿爺丟臉呀！只要實實在在做一兩齣唔讓人討厭的節目，便有人支持的了！何必做「狗」呢？
亞視今天，仍未明白「死因」，仲要搵那無港人要睇嘅左報的低級員工來做高層，擺明想早死早着乎？
哼！一隻叫聲難聽的「笨狗」，死不足惜！還是早死早着吧！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
