城中鏡：楊元慶又私人醒員工
聯想成功登上PC行業龍頭之餘，其包括智能手機與平板電腦嘅多媒體、互聯網數字家庭（MIDH）事業群亦急起直追，主席兼行政總裁楊元慶當然唔會忽略伙記嘅努力。聯想內部已經「通晒天」，楊元慶又掏荷包，攞三百二十五萬美元（約二千萬元人民幣）出嚟，分畀基層員工，估計有近萬名員工，每人可以分到二千元人民幣嘅特別花紅。
楊元慶再次以私己錢獎勵近萬名員工。
今次係佢第二次自掏荷包獎勵員工，聯想內部更將稱之為「元慶特別獎」。分享到獎金嘅員工，遍及聯想全球二十個業務國家或地區，呢個好消息，由聯想人力資源部資深副總裁喬健向員工發出，內部通告形容，楊元慶再次以私己錢獎勵員工，係因為認為作為公司老闆及管理層，有責任確保公司上下明白員工對聯想建樹咁話。
