城中鏡：蘇梅樂游游 施榮懷腰痛拜拜
颱風尤特早前襲港掛起八號波當日，原來廠商會會長Irons施榮懷騎住巨風飛去蘇梅島，展開四日陽光之旅。
施太（後排左起）與囡囡曉雯及次子仲樂齊騎大象，近距離欣賞森林美景。
蘇梅島風光明媚，海邊用餐倍浪漫。（資料圖片）
施榮懷去到蘇梅島度假不忘瘋狂游水，結果暫時治好坐骨神經痛。（受訪者提供）
今次旅行夠晒齊腳，除咗Irons同太太，仲有由美國返港放暑假嘅大仔湧樂同次子仲樂，加埋細女曉雯，Irons仲陪家人騎大象穿梭森林，點知鬼咁多蚊，騎一陣就夠皮喇。轉個頭返酒店做腳底同泰式按摩，價錢平到笑，每小時只係港幣五十元，平過「深圳價」，但對於患有坐骨神經痛多時嘅Irons，就點按都唔掂，最後日日跳落泳池瘋狂游水，估唔到痛楚不藥而愈，佢嘅腰痛好番八、九成，行步路都爽過人。
「溫火」曬 變銅人
咁都未算，Irons企埋鏡一照，全身曬成古銅色，自己都忍唔住笑出嚟。佢話今次以「溫火」慢慢曬，效果好正，睇落成個後生晒喎。蘇梅島水清沙幼，每逢初一、十五都有狂歡派對，吸引唔少年輕人聚埋飲酒，甚至吸毒，佢知道後不忘勸誡兒子話：「呢啲Party你兩個唔去得o架！」自細聽教聽話嘅湧樂同仲樂聽見當然話唔會去啦！
