政壇：搞搞政：吳得掂亂拋書包醜死人
幾乎每隔兩三個月就會爆出蝦碌嘢嘅教育局局長「吳得掂」吳克儉，喺尋日開學日去大埔視察開學情況時又再拋錯書包。
設計圖片及對白
吳得掂同副局長楊潤雄識得分工合作，去唔同學校視察開學日情況，照計都係好事，但偏偏吳得掂用「分道揚鑣」嚟形容二人分工合作，結果就鬧出笑話喇。「分道揚鑣」明明解作兩人有唔同志向，各走各路互不相干嘅意思，如果屬實，即係話佢同楊潤雄鬧不和，聽落以為佢哋是但一個唔撈添！
新聞處做手腳遮醜
聽聞當時一班記者聽完佢講後都一臉疑惑，心諗呢啲低級錯誤竟然發生喺一個主管教育事務嘅高官身上，你話係幾咁諷刺呢？
視察完開學情況，吳得掂就轉去一間小學致辭，繼續發放笑彈。佢話細細個都試過硬背英文字典，仲即場示範背出「a-b-o-u-t大約」，但佢後來先發現背完生字都唔識用，好彩有師兄教佢其他方法至識運用造句。
既然無用，佢又點解要教在場學生背字典呢？落區騷做完後，新聞處就代為出稿，但就自動波將最重要嘅「分道揚鑣」呢四個字變走咗。如果記者無去現場採訪，根本唔知道吳得掂亂講嘢，亦唔知道新聞處做咗手腳。
據了解，今次唔係教育局要求新聞處補鑊，而係有新聞官懶醒咁覺得「分道揚鑣」同「分工」差唔多意思，所以就將前者刪走，直接寫「分工」就算數。其實新聞處都唔係第一次咁做，之前都有試過漏咗官員講話幾個字，令說話意思掉轉晒，最終搞出大頭佛，睇嚟新聞處處長黃偉綸似乎無吸取上次教訓，無教精前線新聞官要「原汁原味」全文照錄喎！
