政壇：囝囝開學日鄭泳舜緊張
尋日係開學日，最緊張嘅莫過於係學生家長，已為三子之父嘅深水埗區議員Vincent鄭泳舜，佢五歲半嘅長子康正升讀小學一年級，佢作為廿四孝爸爸，當然特別緊張啦，一早就拖實囝囝去搭校巴，反而康正個樣就好淡定，見校巴一到已經急不及待跳上車，似乎對新嘅學習環境相當期待。
Vincent笑言，囝囝早幾日已經進行返學「預演」，每朝六點就自動自覺起身，確保返學唔會遲到，認真自律。送完康正後，轉頭又要送細仔康立返學。佢話康立第一次返幼稚園有啲緊張，忍唔住喊咗出嚟，但好快就適應咗喇。至於升讀幼稚園二年班嘅二仔康進，Vincent話佢仲未開學，所以暫時鬆一口氣。
不過，遲吓三個仔開晒學後，佢就頭痕喇。因佢三個寶貝仔分別喺慈雲山、九龍塘同深水埗返學，令佢分身乏術，睇怕到時就要靠太太同親友幫手喇！
