政壇：鼠王芬惹火騷叫停
立法會議員「鼠王芬」梁美芬上屆會期除咗出名捉老鼠，又喺泛民「五區公投」之後，政府推出替補機制嗰時發表「懲罰選民論」，搶盡鎂光燈，但今屆首年會期，唔知係咪多咗建仔蔣麗芸等多嘴之人，感覺上佢就沉咗好多，火花都少咗。不過，鼠王芬今個暑假蠢蠢欲動，既喺上個禮拜聯同多名建制派成立「關注通識教育聯席會議」，要求教育局取消通識科必答政治問題，又上電台同學民思潮召集人黃之鋒舌戰，點起火頭。
設計圖片及對白
而佢幾年前牽頭成立嘅「華人學術網絡」，尋日仲諗住搞個政改研討會，搵埋反佔中行動嘅「幫港出聲」發起人鄭赤琰、經濟學者曾淵滄、城大前署理校長何炘基，同埋港大國際關係學碩士課程主任胡偉星做講者，點知臨時取消，因乜解究呢？
避麻煩專心照顧
鼠王芬話，佢老公城大法律學院院長王貴國，兩至三個月之前一齊去旅行嗰時，腰椎盤已經有事，呢幾日老公都有啲痛，佢諗住都無乜事，照樣出席研討會，點知老公尋日痛到好交關，直程入埋醫院。雖然唔係好大件事，但係都要留院幾日，所以佢決定到九月底至十月初先擇日再議。
基本法委員會副主任梁愛詩上個禮拜六透過午餐會放風，聲言人人有權參選特首，唔代表等於人人都可以成為候選人，又話可以考慮合理限制候選人數目。建制派呢幾日都冇乜出聲回應，但鼠王芬就話「華人學術網絡」將來會就政改有所定調，若果尋日召開研討會，嚟緊幾日都唔慌得閒照顧老公。
外界估計建制派對政改冇聲出，都係唔想挑起火頭，若果鼠王芬尋日個研討會開得成講政改嘅話，可能會好惹火，仲會愈燒愈勁，咁蹺佢老公入咗醫院，吹熄咗呢把火啫！
