徵地過橋抽板 港府逼人造反
「租霸」有兩大必殺技，一個係扮豬食老虎，斯文西裝友原來係專搵老襯嘅專業神棍，一個係反轉豬肚耍無賴，生人霸死地之後死蛇爛鱔唔交租。嗱，新界八鄉居民集體畀租霸欺凌，租務糾紛困擾經年，真係既焦急又無奈。點解唔搵政府部門幫手？因為呢個超級租霸咪就係港府囉。
件事係咁嘅，八鄉上村一帶屬廣深港高速鐵路香港段工程範圍，一○年起大量農地被徵用作建築工地，當時曾蔭權政府詐傻扮懵，隻字不提補償問題。你知啦，官老爺個個西裝筆挺，成個敦厚租客咁款，村民咪不虞有詐囉，點知事後至知上當，補償問題一拖就幾年，拖到依家仲未傾妥，咁多年嚟一個仙租金都收唔到，你話係咪搵老襯吖？
具體啲講，港府唔係唔肯交租嘅，只係無賴到想一折交租咁解。以其中一個個案為例吖，三幅共三萬三千幾平方呎農地被徵用五年零四個月，業主一一年初向當局發信要求每月每平方呎補償兩元至兩元四角，但係直到舊年至收到回覆，還價三幅地一筆過補償四萬五千元，即平均每月呎租兩仙！
呎租兩元變兩仙，港府獅子開大口，同租霸借故拖租有乜分別呀？將心比己，官老爺好多都係隱性包租公，發展局局長陳茂波仲曾經出租過農地，仲出租過劏房添，應該都知道租霸幾咁神憎鬼厭啦。如果你哋嘅出租單位明明租到二千蚊，點知租客求其擺低廿蚊就算數，你哋都嬲到想用掘頭掃把攆佢走啦，吓話？
嗱嗱嗱，咪當新界村民好蝦呀，徵地租霸存心拖租，受害業主家陣警告會下逐客令。有農地業主不滿政府過橋抽板，大石壓死蟹，打算向立法會申訴，要求港府補償每月呎租一元五角至兩元，如果官老爺死蛇爛鱔賴皮拒絕，不排除到高鐵地盤抗議，甚至唔畀工人開工。仲有吖，有區議員至今已經接獲十多宗同類投訴，涉及十萬平方呎土地，透露有村民正尋求法律意見，研究申請禁制令阻止工人進入涉事工地。
唉，唔怪得香港成為「示威之都」啦，根本係港府自己一手造成。同樣係高鐵徵地，菜園村激烈反對，港府天價賠償，八鄉合作交地，港府就「地獄價」租地，咁即係欺軟怕硬啫。如果市民大聲啲你就腳軟跪低，市民唔出聲你就蝦得就蝦，咁搞法，唔使等到佔領中環o架，怒火填膺嘅市民好快就會聯群結隊走上街頭！
點都好，今屆政府話「適度有為」，唔該快啲清理好前朝呢筆徵地蘇州屎吖，叮！
