SUN搞作：少膽虫手記：生化壽司

淫賤黎帶少膽虫去到深水埗某大商場一間著名壽司店，以幾十蚊任食創意壽司，享譽全港，成為遊客必吃劣食之一。「聽講美國領事都想食，作為走狗，點可以唔試？」淫賤黎一坐低就講出真正來意，仲叫咗一大碟著名嘅紅豆軍艦。佢雙手高舉壽司，同少膽虫講：「一齊食咗佢！我哋就係有福我享、有難你當嘅兄弟！」

少膽虫盛情難卻，頭一仰，就將熱辣辣嘅白飯連同呈灰色嘅紅豆一齊吞落去。一片敍利亞生化武器嘅味道同質感之中，少膽虫感到暈陀陀，只見淫賤黎手上仍然拎住舊壽司，似笑非笑咁望住少膽虫。

「呀～～呀～～好難食呀！」少膽虫力竭聲嘶，「點解？點解上帝要容許人類製造啲咁嘅嘢？」少膽虫一邊嗌一邊衝出店外，爬上高處想輕生。

「年輕人，請珍惜生命。」壽司店老闆可能請咗十九才子幫手做師爺，竟然連自殺都要抽水：「人生尚有很多美好的事要來臨啊！快點下來吧，我們在店內等你呢！」而淫賤黎就企喺佢身後，拎住碟梅菜扣肉壽司，向少膽虫招手。