時裝設計師劉培基尋日出席活動,提到香港文化博物館為他舉辦嘅個人作品展,展出多套佢為梅艷芳、羅文等已故名人設計嘅服飾,佢透露展覽首天已有九千四百一十八人次參觀,破盡紀錄,又話:「朋友都話好犀利,如果其中一位仍然在生,能夠嚟到現場支持就會更完美。」被問及會唔會籌辦梅艷芳紀念演唱會?佢就話有聽聞演藝人協會將會籌辦,自己只會支持而唔會參與。

劉培基

此外,提及梅媽因長期欠租,被業主向法庭申請收樓令一案,故此梅艷芳遺產執行人早前已經出售梅姐壽臣山山村道故居套現逾千萬元,其中部分會用作繳付梅媽居所嘅租金,劉聽罷即表現愕然,話:「吓?賣咗(故居)?你肯定?好似話判每月2萬生活費畀佢,咁咪好囉。」

再追問故居賣咗係咪好可惜時,佢話:「冇,物質比唔上一個人重要,最可惜係走咗嗰個人,係梅艷芳!我對梅媽冇乜好講,但希望佢身體健康。」

第一手消息請下載on.cc東方互動iPhone/iPad/Android/Windows Phone Apps