城中鏡：鍾國斌約買衫 幫議員改Look
趁住立法會放暑假，紡織及製衣界議員Felix鍾國斌，相約兩位猛男議員Ben陳恒鑌同漁農界「高佬賢」何俊賢，一齊去特賣場掃平貨，幫兩人改變形象，等佢哋唔使成日着住同一套西裝咁老套。三位男士行足三個鐘，總共使咗六千多元，拍得住愛靚瘋狂購物嘅女士們。
陳恒鑌戴咗呢頂帽，有啲似電視劇《上海灘》入面嘅許文強。
陳恒鑌（中）從旁審視何俊賢（左）係咪着得稱身。
鍾國斌（左）為何俊賢挑選靚衫。
鴨脷洲聚集唔少工廠大廈，Felix透露當中一幢專賣傢俬嘅工廈囊括全港最多知名國際品牌特賣場，由於識摸上門嘅人唔多，所以價錢相當超值。去到特賣場，佢就捉住高佬賢揀衫，主力推介顏色鮮艷嘅恤衫，教高佬賢要着多啲唔同類型嘅衫先可增加新鮮感。
阿Ben永遠「太太Style」
又高又瘦嘅高佬賢話坊間好多衫都唔啱着，所以平日只能「望衫興嘆」。適逢特賣場內唔少衫尺寸較大，佢攞住一大堆衫入試身室，好快就揀到心頭好滿載而歸。之後Felix同高佬賢仲一齊睇中同一款但唔同顏色嘅人造皮褸，仲話遲啲返立會時要一齊着住去開會玩「撞衫」喎！
阿Ben就想齋睇唔買，事關佢話全身所有衫褲鞋襪都係由老婆代購。不過，喺Felix嘅不斷慫恿下，佢最終都買咗件黑袖白領恤衫，話遲啲只要帶埋老婆去特賣場，自己就唔使用腦都可以有衫着喎！咁搞法，睇怕阿Ben着衫永遠都係「太太Style」。
