政壇：麥美娟辦事處開幕無刀用
繼上月喺大窩口開咗第一個辦事處後，立法會議員Alice麥美娟尋日就同超級議員陳婉嫻喺佢服務咗近三十年嘅青衣開設聯合辦事處，但開幕禮期間就接二連三發生甩轆事件。話說Alice喺青衣碼頭舉行辦事處開幕，節目都算豐富，特別安排一段近十分鐘嘅醒獅表演，點知舞獅期間，舞獅頭嘅師傅突然叉錯腳，成個人跌咗落地，引起全場尖叫聲，好彩師傅身手敏捷，有驚無險。
青衣議員辦事處開幕，麥美娟（中）獲哥哥（右）同細佬（左）撐場。
無刀切燒豬，陳婉嫻（左二）作狀以手扮刀劈落隻燒豬度。
舞完獅之後又爆出蝦碌鏡頭，話說當三隻大燒豬被搬到辦事處外等候嘉賓手起刀落時，大家先至發現無刀用，嫻姐就笑笑口扮女殺手，用手嚟扮刀起勢劈落去，Alice就急急腳入辦事處搵刀補鑊，唔知邊個負責準備切燒豬嘅刀呢？呢啲話晒都係意頭嘢，無刀又點殺敵呀？Alice事後強調，今次請嚟嘅醒獅團隊曾參加國際表演賽o架，可能只係一時失手。不過，無論係點，佢都好開心，皆因佢哥哥同細佬都有去捧場喎！
