香港運動員喺國際大賽取得好成績,政府通常都會發聲明祝賀,而香港單車好手陳振興尋日成功喺全運會山地越野單車賽奪得銅牌,身在瀋陽嘅民政事務局局長曾德成好似先知咁,一早喺單車比賽場地默默等待佳音,點知真係畀佢成功等到。當陳振興贏到銅牌後,德成局長即刻一支箭咁標去終點同佢握手兼合照,反應鬼死咁快。如果早前香港大球場爛地慘變大農場時,德成局長都以呢種速度回應事件,批評聲音就唔會咁大喇!

設計圖片及對白

身在瀋陽嘅德成局長,唔知係咪一早收到風有得攞威,晨咁早去單車比賽場地等陳振興凱旋而回。最後有「山地興」之稱嘅陳振興勇奪山地越野單車賽銅牌,搞到德成局長即刻笑到見牙唔見眼,賽後兩人仲合照留念。比賽後唔夠兩個鐘,德成局長已叫政府發表聲明讚揚陳振興攞牌係努力不懈嘅成果,仲話自己為陳振興成就感到自豪同鼓舞。 

事隔多日無解畫

呢啲出嚟攞威叨光嘅場面,德成局長就以極快速度現身,但大家有無發覺,如果政府體育政策出現失誤,負責體育嘅德成局長有冇第一時間出嚟認錯?答案當然係冇啦,就以早前大球場事件為例,傳媒連續幾日報道大球場變大農場嘅情況,連外國媒體都形容大球場為「殺人球場」,搞到香港國際聲譽一下子扣唔少分。不過,當時德成局長依然闊佬懶理,隔咗幾日都無開金口解畫,最後要特首梁振英親自落場視察,佢先至肯向公眾交代事件。

呢兩次事件證明咗德成局長最叻係識走位,知道有鑊孭就走佬唔見影,有威有着數就去攞彩。如果全運會有「男子單人叨光比賽」,相信德成局長一定可以幫香港奪金啫!

第一手消息請下載on.cc東方互動iPhone/iPad/Android/Windows Phone Apps