隱瞞滲漏仲死撐 環保高官明靠害

冇錯，講緊嘅咪就係班環保高官囉。話說新界東北及新界西兩個堆填區先後被踢爆污水滲漏，環保高官一個二個潛水，直到前日署理環境局局長陸恭蕙至蒲頭解畫，點知佢唔係認錯，連半句道歉都冇，反而死撐話當局並冇隱瞞，一收到化驗結果就盡快公布嘞，又堅稱屯門嘅新界西堆填區冇發生過滲漏「垃圾汁」事故，只係打鼓嶺嘅新界東北堆填區滲漏「垃圾汁」。

叮！講緊嘅係污染環境，有害健康嘅「垃圾汁」，唔係健康果汁噃，陸恭蕙輕描淡寫，避重就輕，咁嘅態度真係不敢「恭維」咯。有打鼓嶺鄉紳質疑當局「講大話」，計劃發動百人圍堵堆填區，要求港府交代真相；亦有立法會議員直斥環境局隱瞞滲漏事故，等同蓄意謀殺市民。嗱，呢啲咪叫弄巧反拙，愈描愈黑囉。

堆填區污水滲漏究竟有幾嚴重？有乜影響？本報舊年七月獨家踢爆元朗下白泥村對開嘅后海灣，有大量貝殼類海產離奇死亡並發出惡臭，村民懷疑係新界西堆填區滲漏污染環境，要求環保署徹查。當局接獲投訴後居然無向村民交代，當乜事都冇，直到近日爆出打鼓嶺堆填區污水滲漏醜聞，先至承認曾考慮檢控堆填區承辦商，因為證據不足而撤銷檢控，即係間接承認新界西堆填區滲漏污水喇。

再講埋打鼓嶺堆填區嗰筆，打鼓嶺村村民今年六月底已經投訴堆填區有污水滲漏，環保署死口唔認，直到七月底至證實污水已經流入附近嘅缸窰河，當時死撐話水質符合標準，誰不知過咗幾日又話污染超標，神又係佢哋，鬼又係佢哋，如果話冇隱瞞，細路仔都唔會信喇！

新界西堆填區污水滲漏拖得就拖，新界東北堆填區污水滲漏瞞得就瞞，環保高官講大話當食生菜，簡直不負責任。係人都知，污水滲漏後果可大可小，輕則污染生態環境，重則危害人體健康，點可以咁兒戲o架！

堆填區甩甩漏漏，問題多多，證明環保當局根本冇能力監管好堆填區。難為港府對擴建堆填區計劃死心不息，上次撥款申請過唔到關，仲想喺立法會復會之後再闖關，真係不知自量。即係咁，現有堆填區已經搞到一鑊泡，擴建之後只會對生態環境破壞更大，對居民禍害更深，想過關？好難咯，死咗條心罷喇，叮！