政壇：林崇綏獲南丁格爾獎章

醫管局前總護理行政經理、現任臨時香港護理專科學院院長林崇綏，日前獲紅十字國際委員會頒發第四十四屆南丁格爾獎章，表揚佢喺護理工作嘅卓越成就。呢個榮譽相當巴閉，今屆全球只有三十二個得獎者，林係繼馮玉娟之後，第二位獲此殊榮嘅港人護理工作者。林崇綏難忘工作之一係十年前沙士襲港，當時佢喺總指揮中心統籌前線人手安排同埋開設護理特訓課程，以軍師嘅身份喺背後領航，陪伴一眾前線護理人員走過艱難一戰。直至近年，佢積極籌辦臨時護專，絕對係推動護士專科化嘅先驅。