政壇：陳健波開業委會遇拉布
保險界立法會議員陳健波喺佢住緊嘅南區豪宅屋苑貝沙灣嘅業主委員會選舉當選主席，佢話管理一個大型屋苑同政府管治成個香港有啲相似，同樣要面對批評、圍堵、拉布、同有關利益衝突嘅抹黑指控，必須以「開誠布公」態度應對。
上屆做開業委會委員嘅陳健波早前喺換屆選舉中以最高得票連任，之後仲喺其他委員推舉下當選主席。喺立法會飽嘗拉布之苦，估唔到佢哋召開業委會會議同業主大會時，都遇過有人圍堵同拉布，有時搞到凌晨三點都未開完，但見慣立法會拉布大場面嘅陳健波就強調，任何會議開足三粒鐘都未開完，再開落去都無意思。佢當選主席後，有次開會開到晚上十點幾就搞掂，其他委員立即鼓掌，讚佢主持會議效率高。
