黃家和（右）大讚莫佩玲沖奶茶動作優雅，希望未來有更多女茶王誕生。
由「咖啡大王」升呢做酒莊莊主嘅咖啡紅茶協會主席黃家和（Simon），上月忙完金茶王大賽，又做「義工」幫貿易發展局四出推廣港式奶茶。日前Simon舉辦金茶王慶功宴，歷屆金茶王及鴛鴦王聚首一堂。今年總決賽誕生咗首位女茶王莫佩玲，上海同多倫多賽區亦由女性奪冠，Simon大讚女性沖茶嘅每個步驟特別仔細，動作又優雅，得獎實至名歸。
講到月前購入嘅一個法國酒莊，眨眼間就到葡萄成熟時，Simon下月頭將飛往波爾多，見證第一批「心血」面世。礙於莊園尚未裝修好，佢未敢邀請賓客前往，但身兼中華廠商聯合會常董嘅佢笑言，會內成員經已磨拳擦掌，諗定明年九月組團包機去酒莊飲個痛快！佢透露，已有朋友搵佢度身訂造以個人命名嘅紅酒。Simon公子黃浩鈞帶埋太太Iris及愛女Olive舉家出席慶功宴。
第一手消息請下載on.cc東方互動
