政壇：呂鈞堯添孖女親剪臍帶
前保良局主席呂鈞堯嘅太太Miyoung上星期五凌晨誕下一對孖女，兩姊妹無論輪廓、笑容都十分相似，搞到呢個爸爸一時間都分唔出，邊個係大孖、邊個係細孖，只知道:「大孖塊面好似圓啲，細孖塊面尖啲。」
擁有一個兒子嘅呂鈞堯（中），同太太Miyong（右）喜獲一對孖女。（資料圖片）
大孖、細孖
呂太凌晨兩點幾作動，比預產期提早兩周，主診醫生知道佢係韓國人，專登揀首韓文歌播放、緩和佢嘅情緒，一首歌之後，孖女就出世，做爸爸嘅呂鈞堯都有入產房，好開心拿拿聲剪臍帶，一對孖女各重約四點六磅，白皙皮膚似足媽咪，可愛笑容就似爸爸。已有一個囝囝嘅佢，依家湊埋呢對孖女，三個夠晒數嘞，唔再生。
