政壇：鬍鬚曾復會焗接招
環球金融市場近排風起雲湧，本港資產市場都面臨挑戰，港府推行嘅雙辣招緊箍樓市，地產界唔少人都嘆日子唔好過，早前地產代理界已發起抗議行動，嚟緊仲打算循議會施壓添。有立法會議員就明言，立法會一復會，就會提出修訂案要求當局修正辣招範圍，希望迫使財爺鬍鬚曾早啲推出減辣方案，鬍鬚曾會唔會老貓燒鬚，復會後好快揭盅！
設計圖片及對白
當局針對樓市炒風連番推出辣招，措施落實多月，除咗令到本地一手樓及二手樓成交減少、樓市炒風略有收斂外，樓價並冇點樣回調，業界中人都話，至今樓價平均只係回落咗百分之零點三，但代價就好大，地產代理界更飽嘗夏日寒風之苦。
不過，佢哋雖然一再要求放寬辣招，鬍鬚曾同財經事務及庫務局局長陳家強，甚至金管局每次回應都係預設諸多條件。
外圍局勢變幻莫測
立法會抖暑已近尾聲，有議員已經部署定新一立法年度嘅工作，擬盡快針對辣招提修訂，其中一個建議係放寬港人透過本地公司置業，希望呢類需求豁免買家印花稅，地產代理界亦認為，依家嘅印花稅徵收方法太辣，應該適度放寬。
鬍鬚曾佢哋對遏抑樓市炒風嘅立場好堅持，但家吓資金外流，外圍局勢會唔會重演亞洲金融風暴都冇人知，立法會議員提修訂案，鬍鬚曾及財金官員喺風頭火勢下想做鴕鳥都唔得，勢被迫焗接招。
