城中鏡：莊敬賢跑出接掌LME
講咗成個星期有多嘅倫敦金屬交易所（LME）CEO接班人，人選終於拍板。LME最終請唔起商品界「天之驕子」金屬期貨經紀商Triland Metals營運總裁Martin Pratt，於是乎另一個熱門NYSE LIFFE前行政總裁Garry Jones（莊敬賢）就「冷手執個熱煎堆」，順理成章成LME新揸弗人。早前已聽聞，Pratt人工超高，雖然LME已向Pratt發出聘書，但佢係咪會接受LME邀請，都有變數。結果真命天子果然另有其人。
莊敬賢成為LME新揸弗人。
李小加激讚莊敬賢係人才。
問港交所總裁李小加，Jones係咪「次選」？小加總裁冇正面回應，只係話遴選委員會物色咗好多人，仲激讚Jones係人才，並用「leader」（領袖）來形容Jones，相信Jones除咗可領導LME外，更加會係一個能幫手勾畫整個港交所集團未來方向嘅人。Jones預期九月三十日會加入LME，並接替於年底離任的Martin Abbott（艾博賢）。
LME因面對涉嫌操縱鋁價訴訟，依家正值風雨飄搖之際，搵到CEO接班人當然係值得高興，但同時，有份傳角逐CEO嘅現任副行政總裁Diarmuid O'Hegarty（歐德銘）就「劈炮」，已提出請辭，六個月後離任。
