城中鏡：林亮經典鴨成工展吉祥物
巨型Rubber Duck早前風靡全城，喺幾個月後大家可能見到另一隻經典巨鴨，都係多得工業家林亮獻出第一次，同中華廠商聯合會合作，將其當年紅極一時嘅可愛黃色經典膠鴨仔變成年底工展會嘅吉祥物，林伯仲與時並進同意更改經典鴨仔嘅外貌造型。
林亮認同自己嘅經典鴨仔多年未變過，所以容許廠商會更改設計。（資料圖片）
林亮嘅經典鴨仔當年曾打敗日本以「賽璐珞」物料製造嘅鴨仔。
為幫工展會打氣，林伯月前主動聯絡廠商會展覽服務有限公司主席Jimmy吳永嘉，交出早於四十年代繪畫嘅膠鴨手稿，希望以傳統工業撐工展會，並作慈善義賣，回饋社會。Jimmy找來兩位專業設計師為林伯嘅經典鴨仔設計注入新靈感，包括將鴨眼睛改成水汪汪眼晴，鴨嘴角更彎更翹，睇落笑容更甜，同時會設計一個鴨家族，等市民集齊一套。究竟吉祥鴨會係乜樣呢？下月面世就知喇！
林伯雀躍話隻經典鴨仔當年係以嶄新物料，打敗日本以「賽璐珞」物料製造嘅鴨仔，記錄咗本港玩具業一段光輝及辛酸兼備嘅歲月，又係無數市民嘅集體回憶。
