城中鏡：遊蒙古 探孤兒歡「茵」難忘
好多政商界名人都趁住暑假出外旅遊充電，綠草藍天、風光如畫嘅蒙古國都係一個好嘅選擇，而東華三院前總理Iris梁煒茵，日前同二十多位教友就選擇探訪當地嘅孤兒。初嘗入住蒙古包滋味，雖然無水沖涼四日，言語又不通，但係蒙古小孩嘅純真笑臉，完全融化咗香港人嘅心靈。
相處只有短短四日，梁煒茵（左）抱住外蒙小女孩不放，情如姊妹。（受訪者提供）
蒙古包冇浴室設備，梁煒茵焗住四日無沖涼。
蒙古國小朋友生活簡樸，一個簡單的玩水遊戲，已足夠樂上半天。
四日無水沖涼
初次遊蒙古國，地靈人傑，小孩尤其熱情，見有稀客到訪，主動上前幫手攞行李。Iris話當地人只會講蒙古語，起初有點雞同鴨講，加上手語同身體語言溝通後，好快混熟，大夥兒齊玩呼拉圈、大草原上騎羊仔，晚上再圍圈開營火會，圍着火爐唱歌跳舞，一起分嘗駱駝奶，縱然沒有電腦、手機，仍然笑聲不絕。
無水沖涼四日，Iris笑言「無所謂，臭就臭，由得佢」，佢同小孩玩得忘我時，碌喺草地上都唔介意。
外蒙對外通訊唔係幾方便，身處無WhatsApp、無得收email的日子，感覺好輕鬆。佢話難得靜落嚟細味生活，體會人與人之間，相處其實好單純，不必太多猜忌，反而更開心。
