嗱！今劑未開壇之前，先旨聲明，本文並非唔幫窮人，只不過，我的宗旨，確立於「是其是，非其非」，上帝都係咁話！
香港呢個扶貧委員會決定向工廈劏房戶派錢，更巧立名目，將這些「違法居民」，美其名為：「非公屋、非綜援的低收入家庭」給予「一次性津貼」。庫房積存大把水，攞少許出嚟幫助窮人，當然係件好事，但呢個香港廢柴政府之庸廢，直情去到「薄熙來化」的境界，長官意志先行，再不顧法紀矣！為求達到目的，已不擇手段，龍門鍾意點搬都得！
「劏房」係乜嘢嚟o架呢？平民化的講法，係業主將樓宇間開多個小房出租。其實，任何樓宇有任何間隔改動，業主必須聘請合格測量師畫則，及須獲屋宇署批許，否則，算是illegally structures（非法建構）！工商大廈更立例規定不得作居所住人。現香港廢柴政府，有罪不罰，還砌詞狡辯，話「工廈劏房」的業主才有「違法之嫌」，租客並無違法。最反智的，係扶委會旗下關愛基金小組主席羅致光說：「屋宇署向有關工商廈單位發出清拆令，而業主未執行，才算違法」，「即使關愛基金秘書處職員（知悉是非法建構），亦無理由懷疑上述違規，故毋須向執法部門舉報，所以工商廈的劏房戶可納入津貼計劃內」，嗱！你哋話，佢哋黐唔黐膠線吖？用啲乜嘢邏輯（或身體邊忽）嚟思考o架？
之前，那個打靶貪曾煲呔，一聲「活化工廠大廈」，狂益地產惡霸，搞到捱窮的藝術家冇瓦遮頭o架啦！今天，一個為收買人心的低分弱勢廢柴政府，要博政績，而漠視法理，亦唔諗「源頭減廢」方案，氹大家歡喜一次得一次，這短視施政，只顯示短命鬼作垂死掙扎的表現，不值得支持！
再重申一次，本人永遠站在正義弱勢的雞蛋那邊！無矣！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
第一手消息請下載on.cc東方互動
