張炳良同高永文爭石門安興里幅地。
今屆政府銳意解決市民住屋問題，但因為土地短缺而要四出覓地，最近仲發生部門之間盲搶地情況。
高永文
「貪曾」前特首曾蔭權爵士在任時隨口噏當秘笈，亂噏要喺全港十八區各區興建骨灰龕場，仲擺晒啲區議會主席上枱，搞到怨聲載道。當時有幾區已擬訂好建龕場嘅位置，其中沙田區嘅地點就係石門安興里。不過，自從政府換屆後，一直都冇人再提過呢笪地，當地區人士以為事情不了了之，突然上月就有新進展。據聞首先係張炳良嘅運輸及房屋局轄下嘅房屋署官員搵相關沙田區議員重提呢個地點，但唔係建議起骨灰龕，而係建公屋。
政府內部溝通混亂
呢班區議員不以為然，諗住建公屋梗係好啦，所以就一致贊同。點知事隔一星期，竟然有另一班來自高永文嘅食物及衞生局嘅官員又搵佢哋接洽，話要用同一笪地建骨灰龕場，於是搞到班議員一頭霧水，批評政府內部溝通混亂，令人無所適從。
有地區人士質疑，政府內部溝通混亂，無長遠規劃，為咗搵地建屋搞到方寸大亂，唔單止地區、連各政策局都無所適從。講番今次喺沙田石門嘅呢笪地，雖然食衞局最終搶番笪地，但期間發生嘅混亂過程，已成為區議員嘅笑柄，話唔知點解嗰度咁旺，搞到生人同死人都要爭地喎!
第一手消息請下載on.cc東方互動
