政壇：退休警「舉報團」傾唔掂數
行政會議成員鄭耀棠聯同八個立法會議員，攜妻帶女參加國泰豪遊法國「收機團」引起公憤。一班退休警員都睇唔過眼，一行四十人尋日原本打算由太子警察體育遊樂會出發，直闖北角廉政公署總部舉報呢班「團友」，但準備出發之際，先至發現大家嘅舉報對象原來唔同，結果班退休警員好似玩街頭快閃咁，傾唔掂數後喺太子四散。
原來退休警員對舉報對象出現嚴重分歧，有半數「兄弟」覺得班議員攜妻帶女豪遊法國貪就係貪，應該送所有「團友」受審，但有一半人就覺得九名「團友」當中，身兼律師嘅白鴿黨黨員何俊仁同涂謹申明知故犯，罪加一等，要告應該告佢哋兩個先。
有「報警團」成員私底下透露，實情係話晒一場舊同事，大家都唔想因為呢次舉報搞到「面左左」而作罷。吓，依家講緊議員涉嫌利益衝突喎，搞完一輪又話唔舉報，有冇兒戲啲呢？
