政壇：日本考察郭偉強賣萌
有行政會議成員同多名立法會議員接受航空公司款待豪遊法國，引來軒然大波，搞到其他立會議員外訪考察時都唔敢「玩玩吓」，其中正喺日本考察嘅立會內務委員會轄下的扶貧小組委員會，前日仲排排坐好似上堂咁交流，講到尾都係洗脫最近外界對議員嘅欠佳印象。
立會內務委員會轄下扶貧小組委員會正在日本訪問，委員之一嘅獨立議員Paul謝偉俊，定期喺社交網站上載考察照片報告最新情況，似乎想畀大家知道佢哋考察行程有幾緊密同幾正經。
喺數十張已上載嘅相片中，大部分都有阿Paul嘅蹤影，其中一張係佢正襟危坐等交流嘅相片，但細心留意時就發現，坐喺後一排嘅工聯會郭偉強，成功望鏡頭搶鏡嘅同時，仲疑似學習時下年輕人「賣萌」，舉起勝利手勢，唔知呢啲係咪苦中作樂呢？
