設計圖片及對白
深水埗區內兩個新大型屋邨，包括長沙灣邨同榮昌邨即將落成，區內多名區議員早就蓄勢待發，向準備入伙嘅居民提供全方位服務，力爭屋邨成為自己嘅票倉，但估唔到連邊個區議員獲房屋署安排睇樓，甚至屋邨單位圖則都要爭一餐。近日有建仔區議員有感被「大細超」，聯同多個獨立議員上書區議會作大控訴，仲「上綱上線」要求房署為保名聲，應嚴肅調查今次「大細超」事件喎！
投訴信由深水埗區十二個區議員聯署，啱啱好係該區區議會嘅一半，事緣建仔陳偉明、鄭泳舜上月趁長沙灣邨入伙前，向房署要求安排區議員率先睇樓，但一直都冇聲氣。其後有人發現有民協議員向居民派發嘅入伙宣傳品，竟然內有屋邨圖片同單位間隔等詳盡資料，自然令冇圖則在手嘅議員一頭霧水。
批房署厚此薄彼
正所謂「吃不到的葡萄是酸的」，建仔眼見自己喺深水埗區得唔到同等禮遇，決定將事件擺上枱，批評房署「嚴重損害與區議會互信和合作的關係」，擺明係唔妥房署厚此薄彼，想攞番個公道。
雖然房署今次的確有「大細超」之嫌，但其實呢啲意氣之爭實在好似細路仔爭寵咁，搶唔到睇樓嘅頭啖湯就亂咁開火。不過，眾所周知深水埗區近年競爭激烈，呢區可謂民協嘅最後防線，所以區內得番包括立法會議員馮檢基在內七個議席嘅民協自然機不可失，爭取每個曝光機會。綜觀深水埗區問題多籮籮，唔係話搶到張屋邨圖則就定勝負，區議員係咪應該將精力放喺兩個新屋邨有乜改善地方呢？
第一手消息請下載on.cc東方互動
