SUN搞作：少膽虫手記：很想罷吧
一直以嚟，壹全霉有三樣唔好：人工低、薪酬差、份糧少。最緊要嘅係，呢三樣嘢都唔關少膽虫呢啲高層事，只係嗰班啱啱畢業嘅傻仔傻女先至畀我哋壓價壓成咁。好景不長，自從啞視被勒令炒CEO，開創全霉爛就要罰嘅先例之後，少膽虫日日都提心吊少膽，生怕壹全霉炒自己。
少膽虫愈諗愈唔妥，忍唔住拍枱大嗌：「唔得！壹全霉員工，聯合起來！」記者菜嫌貴聞聲趕嚟：「腦腫！罷工呀！今次搞大佢！」難得連一眾記者仔都走過嚟支持平時乞人憎到爆嘅少膽虫，菜嫌貴督促下，少膽虫惟有硬住頭皮搵淫賤黎。
「你窮？尋日仲見你玩高達喎！」淫賤黎尋日見到愛國愛港嘅「高達」殺上嚟壹全霉質問少膽虫，就以為少膽虫有錢玩高達模型，無錢買牛肉：「仲想加人工？食懵咗呀？」少膽虫嚇親，正想搵下台階，菜嫌貴就破口大罵：「淫賤黎！你知唔知日日做十二個鐘，排隊打卡搞到遲少少又唔畀，周圍又污糟邋遢，不見天日，食飯都無得出去食呀？你乜都唔使做，就有錢玩Barbie公仔，咁就好妥咩？」
「喂！唔准爆我玩Barbie！」淫賤黎面都紅晒：「我加你0.689%人工，同我出番去！」少膽虫即刻收貨，想掹番菜嫌貴出房，點知佢繼續話：「你有銀加畀港鐵工人咩？我係話要罷工呢單嘢做頭版新聞呀！」淫賤黎同少膽虫終於大徹大悟，但有啲奇怪點解好似講緊位於垃圾堆填區嘅壹全霉咁。
