城中鏡：薛關燕萍升職 冇咁快退休
掌管恒生銀行中國業務嘅薛關燕萍，事業再上層樓。恒生尋日公布，現年六十一歲嘅薛太，由上周四起，由非執董升任為執行董事兼中國業務主管。五十四歲嘅恒生（中國）常務副行長Gordon林偉中就會坐正，接替薛太擔任恒生（中國）行長，但薛太就會繼續出任副董事長一職。
薛關燕萍事業更上層樓，睇嚟冇咁快退休。（資料圖片）
年初嗰陣，市傳薛太因年屆六十歲嘅退休年齡，可能會退休或者獲彈性延長任期，睇今次呢個安排，相信佢應該冇咁快退休啩！
至於接棒嘅Gordon已喺同日升任行長。佢喺舊年一月至加入恒生（中國），任職企業及商業銀行業務拓展主管，同年三月升任副行長。加入恒生之前，Gordon係滙豐（中國）環球銀行中國區常務總監。佢一九八二年加入銀行界，擁有超過二十年嘅內地業務經驗。搵到佢繼任行長，薛太都可以功成身退喇！
