城中鏡：名廚鬥減磅 輸家扮女侍應
兩大米芝蓮名廚Harlan Goldstein同Alvin Leung由廚房鬥到健身房，尋日公布三個月地獄式減肥後嘅賽果，Harlan減去逾四十五磅，擊敗減咗三十七磅嘅Alvin，後者將於十一月接受大懲罰，打扮成女侍應到對方餐廳工作一晚。Alvin笑言，到時肯定會化妝喎！
Harlan（左二）同Alvin（右一）即場過磅分勝負。
瘦咗一大截嘅Harlan同之前判若兩人，雙下巴、大肚腩消失，血脂、糖尿、血壓回復正常，最開心莫過於佢太太Helen喇！Helen話識老公嗰陣仲瘦過依家，睇住佢日漸「吹脹」，曾以離婚逼令佢減肥無果，幸而今次的起心肝勤做運動，仲戒埋最愛嘅紅肉同紅酒。
瘦咗嘅Alvin望落亦年輕咗，佢笑言今次係雙贏。佢仲即場向Harlan再下戰書，要喺未來兩個月保持依家嘅磅數。至於二人之前各押下嘅二萬元注碼，將如期捐畀指定慈善機構。
