城中鏡：三太代超蓮澄清冇新歡
賭王何鴻燊三太陳婉珍尋日以東華三院主席身份出席「新世界單車慈善錦標賽2013」記招，提到其千金何超蓮早前被拍到同異性逛街，問到超蓮係咪有新男友？佢代女澄清話冇。至於超蓮係咪仲係同吳克羣拍拖，佢就話唔知道。咁最近囡囡少咗玩社交網站，係咪你叫？佢話：「佢哋自動自覺，唔使我叫。」
陳鴻業夫婦（右起）同三太陳婉珍現身撐單車慈善賽。
談到單車運動，三太話有踩單車但唔擅長：「小朋友叻過我。囝囝就鍾意踢足球，夜晚為咗踢波而唔食飯，話食得太飽踢唔到波。」
名媛榮文蔚表妹鄭詩韻亦現身撐丈夫陳鴻業場，陳鴻業係全盟體育有限公司主席，亦係單車運動愛好者，佢話：「以前打冰上曲棍球，但年紀開始老，成日受傷，復原時間耐，唔似後生仔，斷咗腳兩星期就好番，我要兩年。踩單車就係靠意志，我仲可以同後生仔競爭。」
