城中鏡：單身趙麗娟 樂做會計紅娘
為咗要計好盤數兼妥善理財，會計師日日對住一堆密麻麻數字，其實都幾悶。會計師公會會長Susanna趙麗娟決意打破悶局，興趣多樣化嘅佢，喺公會內舉辦多個興趣小組，更聯同其他專業界別舉辦聯誼活動，成功撮合唔少姻緣，慢慢成為「會計界紅娘」。身為單身貴族嘅Susanna，雖然未有從興趣中搵到另一半，但賺來嘅友誼比愛情更可貴。
舞林高手
跳拉丁舞係趙麗娟嘅強項，佢將興趣帶畀會計師聯誼。
牽紅線
趙麗娟樂做會計界紅娘，積極舉辦各項興趣班，成功撮合唔少姻緣。
教理財
趙麗娟（前排左一）帶領一班會計大使走訪校園，向下一代灌輸正確理財觀念。（受訪者提供）
Susanna坦言年輕時因種種原因錯過數段姻緣，但佢從無後悔，同前男友仍保持好友關係，將以往嘅美好回憶埋藏心中。縱使單身仍活得自信充實，佢鼓勵單身女性唔好怕嫁唔出，最重要係了解自己要啲乜，而佢追求嘅係友情、親情同貢獻社會嘅滿足感。但佢亦唔抗拒愛情：「我好信緣分，遇到志趣相投嘅人，我都會結婚o架！」
講到嗜好，佢話最愛攝影，憶述幾歲大嗰陣，爺爺買咗部傻瓜機畀佢，佢就由朝到黑拎住部機周街影，仲偷偷哋走入嫲嫲間房當「黑房」曬相，搞到一陣藥水味。至於佢嘅另一強項係跳舞，特別係拉丁舞，至今定期與同業組隊參賽。
適逢今年係會計師公會成立四十周年，佢話未來將搞搞新意思，帶領一班「會計大使」義工，為非政府機構提供理財評估及諮詢，令機構營運更有效率。同時公會年前亦開始走訪中、小學，以講故事、路演等方式說教，向學生灌輸正確理財觀念。
