政壇：失明人用凹凸屏貼打手機
究竟失明人士點用智能手機呢？失明人協進會會長莊陳有日前出席一個活動時，就喺褲袋攞出一部智能手機即場示範，用得頗揮灑自如。佢話只需開啟手機嘅發聲功能，同埋貼上一塊價值約八十元嘅凹凸字屏幕貼，就可以好似普通人咁使用，用WhatsApp等軟件通訊都冇難度。
莊陳有全靠凹凸字屏幕貼同聲音及觸感操作智能手機。
今年高考放榜嘅焦點，莫過於憑唇讀「吻」出佳績嘅失明兼弱聽學生曾芷君，莊陳有話早年已認識對方，好欣賞芷君能排除萬難達到目標。佢話無論係殘障抑或健全嘅人，都有唔同程度嘅限制，所以每人都應該有一顆積極發掘潛能嘅心。
對於殘障人士學習較一般人困難，莊陳有希望政府多放資源發展融合教育，畀一般兒童與身心障礙兒童一同學習，以及進一步推廣無障礙電子書。佢又話讀寫障礙及失去手部等人士都好需要電子書，但需要政府修例，以便與國際條例接軌。
