政壇：學明唔開會發叔黑晒面
新界鄉議局每逢開大會，主席劉皇發身旁總會見到兩位副主席張學明、林偉強嘅蹤影，佢哋猶如發叔左右手。但尋日鄉議局舉行特別大會，討論係咪支持西灣村村民向政府提司法覆核時，竟然唔見張學明。我哋問發叔到底學明去咗邊，發叔黑晒面話連佢都唔知喎！
張學明進身為行會成員後，反而好少出聲。（資料圖片）
學明唔止係副主席，仲係行政會議中唯一嘅新界人代表，照計應由佢出頭幫村民發聲，將新界人聲音帶入政府。偏偏尋日咁緊要關頭就唔見咗佢，所以特別大會後，有記者問發叔點解唔搵學明幫手，發叔都好似有難言之隱咁，反而隔籬林偉強聽到後反應迅速，即時搶住發言話：「你哋（傳媒）搵佢好過我哋搵佢啦！」擺明暗寸學明無現身撐新界人。
其實發叔年事已高，所以鄉議局一直盛傳由學明接替發叔「揸莊」，但學明進身為行會成員後，反而好少出聲，無論係丁屋僭建事件抑或堆填區風波，都係由發叔老人家出面，未見學明發功，似乎發叔要安心交棒，仲要過一段時間先至得。
