政壇：神華業績會畀環團踩場
呢排啲上市公司排住隊交成績表，管理層相繼亮相，神華管理層原本安排咗尋日見人，點知答咗兩條問題就急急腳走，無辦法，畀環保團體踩場，三十六着，走為上着。
綠色和平代表喺神華業績會展示生態圖片。
內地好多煤炭、礦業公司，都被批評破壞環境生態，環保團體綠色和平早前出過一份報告，指神華旗下鄂爾多斯項目大量開採地下水，又不合規格排放污水。既然管理層咁人齊，佢哋點會放過機會呀。
點解綠色和平嘅人咁容易入到會場？其實佢哋唔係打晒鑼鼓咁嚟抗議，入咗場都冇人知。最神奇係雖然好多人參與答問環節，但佢哋喺第二輪發問環節，就畀主持人「點中」，呢位代表即刻表明身份：「我是綠色和平……」，佢嘅同伴就展示咗一大幅生態圖片。
神華總裁凌文好鎮定咁答，神華生產完全符合政府標準，而且鄂爾多斯項目更已實現零排放，強調集團接受批評，但希望批評公平及公正。答完呢個問題，整個交流會就突然結束，凌文對於綠色和平代表踩場感到遺憾，但遺憾之餘，相信佢都要諗諗計，以防下次又有突襲！
