政壇：卿姐否認想選特首
二○一七年特首選舉一人一票，對政治人物而言含金量極高，無輪贏輸，參選過都臉上貼金。至於泛民中有邊個可以代表出選，一向眾說紛紜。最近商界盛傳白鴿黨主席劉慧卿動作頻頻，不時透過中間人相約有分量嘅商界人士會面、甚至飯局，話題當然離唔開政改。有人透露卿姐用好大部分時間傾特首選舉，明顯有興趣參選。搞到唔少商界中人都心有疑團，唔通卿姐想代表泛民參選第一屆普選特首選舉？但卿姐同我哋講，話無表態參選呢回事。
設計圖片及對白
據聞卿姐相約商界中人食飯，幾個月前已開始。佢雖然從政多年，但商界人脈始終係弱項，每次都靠「中間人」搭路，而佢同商界人士食飯時，就經常強調泛民最怕二○一七年有篩選，又怕泛民自己人打自己人，估計泛民為免分薄票源，最多推舉一人出戰，所以泛民一定會舉行初選，等市民揀心水候選人。
似乎想釋出善意
點知有心水清嘅商界人士反問卿姐。「咁你哋搞泛民預選，咪即係篩選？」據聞卿姐當堂唔識反應，幸好該商界中人打圓場，話預選同篩選唔同，就算泛民中人預選落敗，都可照舊參選特首。卿姐聽完之後即刻點晒頭話：「咪係囉！咪係囉！」
其實白鴿黨近日都頻頻約見唔同人士傾政改，但講嘅都係制度，唔係人選，更加無討論卿姐有興趣選特首。商界中人對卿姐「突然主動」約傾特首選舉，都感到奇怪，有人仲認為卿姐近日作風轉趨溫和，又肯包容提名委員會，又同全民提名劃清界線，似乎想釋出善意。
我哋問番卿姐動作頻頻所為何事，佢話自己唔熟商界人士，所以要靠立法會幾位商界議員幫手，約見其他商界中人。至於係咪放風想選特首，卿姐話絕無咁嘅事，只係交流吓意見喎！
