「文愛」呢個潮語真係有啲文藝感覺， 又「文」又「愛」，一睇就知同男女關係有關。 「文愛」呢個潮語係嚟自大陸地區，喺香港唔算流行，但係「文愛」呢個行為本身喺香港已經流行咗多年。潮語所謂「文愛」，查實就即係 「文字性愛」嘅簡稱。係男女、男男或者女女雙方，透過即時文字通訊軟件，互傳性愛嘅文字訊息，配合雙方各自自慰而達致性高潮，香港叫呢種行為做 「Cyber Sex」。

香港雖然位處亞熱帶地區，又有水深港窄嘅維多利亞港，有水又有雨水，但係唔知點解，成日被稱為沙漠。本來以前由有文化有傳統嘅大英帝國統治都好啲，但自從主權移交，香港文化水土流失之快，比起大黃河上游沙漠化更快速。香港本來已經係文化沙漠，依家更加係民主沙漠、回憶沙漠、關懷沙漠、歷史沙漠……加上愛字頭同愛港人士一把火般熱情，香港甚至好快會變成熱情的沙漠！香港人文化水平，比起其他華人地區，確實係較為遜色。尤其係語文及文字能力方面，經過特衰政府教育當局亂搞咗咁多年後，好多年輕一代中英文水平低落，平日只能靠外星話溝通。到咗呢一代嘅MK仔女，可能遇到心儀嘅異性，分分鐘連情信都唔識寫！不過話雖如此，如果你叫佢哋搞 「文愛」嘅話，新一代又隨時叻到識飛！

「文愛」或「Cyber Sex」喺香港一早喺十幾年前已經流行，國內亦都玩咗好多年。隨住科技進步，「文愛」已不單用文字去玩，好多時都會配合WEBCAM，大家對住部電腦嚟搞嘢，肯定唔會搞出人命，更唔會傳播性病，更加免卻好多麻煩，甚至無分國家地域，話玩就玩。對於上咗年紀嘅人士，可能會對「文愛」匪夷所思，淨係睇字都會興奮嘅咩？其實有時文字嘅想像空間更加大，幻想嘅世界永遠係最好，感覺可能比現實更舒服。不過，虛擬嘅嘢始終唔能夠取代現實。例如日日有人喺網上用文字搞港獨，但現實又點呢？依然係被高度自治高度屈機，「文字抗爭」其實咪同「文愛」一樣……最後咪又係打飛機囉！

第一手消息請下載on.cc東方互動iPhone/iPad/Android/Windows Phone Apps