立法會議員出外考察可以開公數，但區議員就無呢啲着數，皆因區議會並無考察津貼費。代表區議會嘅立法會議員葉國謙曾多次提出爭取有關津貼，但政府始終無聲無氣。其實就算政府肯做，經過呢幾日爆出葉國謙同其他立法會議員接受航空公司款待，免費豪遊歐洲，引起社會咁大回響，相信以後區議會要爭取外訪津貼都幾難囉！唔知葉國謙會否覺得自己累街坊呢？

設計圖片及對白

今屆政府經常話要下放權力畀區議會，首先每個區議會獲一億元撥款搞社區重點項目計劃，令區議員嘅工作量逐漸增加。但工作量增加，薪金就冇得加，就算佢哋最近成功爭取嘅醫療津貼，其實都係貼啲唔貼啲，所以區議員真係怨聲載道。聽聞最近佢哋就極力爭取外訪津貼，原因係目前區議員若要就地區事務外訪或考察，莫講話同行家屬冇得免費，連區議員自己都要全程自費。

其實葉國謙過往曾喺立法會提及容許區議員外訪開公數嘅問題，但據聞政府經過研究後，考慮到區議會太多人，全港十八區單係直選議員都有四百幾人，所以最後都係傾向乜都唔做。葉國謙今次唔單止自己免費搭飛機豪遊，仲帶埋愛女一齊接受航空公司款待，令人有其身不正嘅觀感，試問區議會以後仲邊有說服力同牙力向政府爭取區議員外訪津貼呢？如果區議員真係因為葉國謙而爭取唔到津貼，咁區議會功能界別呢個位就好應該換人喇！

第一手消息請下載on.cc東方互動iPhone/iPad/Android/Windows Phone Apps