政壇：台灣有位10A行長
以前讀書嘅時候最希望做到「10A」狀元，但原來銀行界一樣有個「10A」行長。收到風，尋日台灣央行行長彭淮南被《Global Finance》雜誌評為A級行長，成為全球第一個拎到「10A」榮譽嘅央行行長呀！
彭淮南
聽講呢份雜誌喺業界好有權威，事關雜誌總部喺全球金融中心之一嘅紐約，讀者全部都係財金界專業人士。早喺九四年就開始對主要國家嘅央行行長進行評級，咁多年就以彭淮南嘅成績最彪炳。早喺二○○○年，彭淮南已經拎到第一個A，而且由二○○五年開始，佢仲連續九年拎到A級評價，加埋就成為全球第一個「10A行長」啦！
此外，聽聞今年唔單止彭淮南拎到A，就連馬來西亞央行行長Zeti Akhtar Aziz都拎到A，而歐洲央行行長德拉吉就有A-。而大家好熟悉嘅美國聯儲局主席伯南克就拎到B+，不過中國人民銀行行長周小川就得C咋！嚟緊呢一年，小川哥要加把勁啦！
