小學教師林慧思粗口辱警事件持續發酵,天主教香港教區前主教陳日君不滿特首CY梁振英要求教育局就事件提交報告,認為CY應被人粗口對待(粗口對待論)。

之後陳日君疑似想文過飾非狡辯,但最終喺最新一期《公教報》靜雞雞認衰,親自撰文承認講過叫人用粗口鬧CY言論,但就死撐同真正鼓勵別人用粗口鬧CY係有距離,真係講都無人信啦!

CY要求教育局就林慧思事件提交報告令全城關注,陳日君早前接受傳媒訪問加入戰團「抽水」,批評CY做法過火,又突然爆出「離譜呀佢,你鬧佢粗口啦你,我支持你」嘅言論,引來各方嘩然。

事隔兩日後,陳日君再接受訪問即時為「粗口對待論」消毒,強調教會絕非鼓勵講粗口,企圖可以蒙混過關。

雖然唔知教區係咪有就事件畀壓力陳日君,但陳日君就喺最新一期嘅《公教報》認衰,辯稱「粗口對待論」只係隨便談話時「講笑咁講嘅」,承認呢啲說話講笑都不適宜,自行形容呢啲係「激氣話」喎!如果照陳日君咁講,第時佢講完乜嘢都可以當冇講過,乜都佢講晒啦!

第一手消息請下載on.cc東方互動iPhone/iPad/Android/Windows Phone Apps