馬會事務執行總監Kim麥建華日前獲委任為醫院管理局檢討督導委員會成員,與官員同專家一齊幫呢隻病入膏肓嘅「大白象」把吓脈,睇吓有乜靈丹妙藥幫佢重拾健康。Kim係註冊土木工程師,但近年成日喺醫學界出沒,難免令人混淆早年喺英國參與醫療改革時,佢嘅博士(Dr.)銜頭仲被當係醫生添,成日被身體不適嘅朋友問診,認真搞笑。

麥建華嘅博士銜頭經常被人誤當醫生,搞到好多人搵佢睇症。(資料圖片)

睇番日前政府公布嘅醫管局檢討督導委員會成員名單,當中有醫生、教授,全部都係知名人士,身份最特別嘅係Kim,事關佢係工程師出身,其後轉型做管理工作。多年前佢到英國工作期間,更獲邀加入公共醫療改革委員會。二十幾年前,香港醫管局成立時,佢都係委員會成員,依家仍然係醫管局人力資源委員會及職員上訴委員會成員,唔講仲以為佢讀醫科出身添!

今次Kim又被委以重任,佢都忍唔住自爆當年喺英國參與醫療改革嘅尷尬事,事關博士同醫生嘅英文冇分別,好多委員若有身體不適就搵佢,佢解釋次數之多,連自己都數唔到喎!

第一手消息請下載on.cc東方互動iPhone/iPad/Android/Windows Phone Apps