立法會議員梁美芬上月中參加母校中文大學搞嘅北歐郵輪遊,同老公城市大學法律教授王貴國喺十二日內暢遊北歐七國,據講民政事務局副局長許曉暉都係船上客。

梁美芬(左)喺哥本哈根巧遇伍廷芳後人(右)。(受訪者提供)

梁美芬喺尾站丹麥哥本哈根留多一日,佢話喺嗰度難得「他鄉遇故知」,除咗喺香港做嘢嘅菲傭認得佢,連搵人幫手揸相機嗰陣都遇啱同聲同氣嘅華人,傾落先知對方嘅先人係香港前立法局議員,仲係首位華人議員伍廷芳添!梁美芬話對方喺美國長大,喺當地做醫生,估唔到身在外地都遇到前輩嘅後人咁話。

此外,佢哋一班中大舊生仲途經挪威奧斯陸、芬蘭赫爾辛基同瑞典斯德哥爾摩等地方,而佢始終鍾情哥本哈根同奧斯陸,仲自言旅程除咗令成個人得到沉澱,亦反思咗好多嘢。唔怪得佢上月底返港後,面對下屬、香港家長聯會會長李偲嫣捲入教師林慧思嘅爆粗辱警風波時,都應付自如喇!

第一手消息請下載on.cc東方互動iPhone/iPad/Android/Windows Phone Apps