立法會議員接受國泰豪華款待豪遊法國一事搞到滿城風雨,正喺台灣考察嘅立會扶貧小組委員會即時聞風收斂,紛紛謝絕台灣當局奢華款待之餘,膳食方面全部都係清茶淡飯,又唔敢參加同公務無關嘅觀光活動,莫非佢哋擔心外界會將兩件事拉埋一齊嚟批評?

設計圖片及對白

改機票玩到盡

有份參加考察團嘅Paul謝偉俊話,為免被人誤會佢哋借考察為名去觀光,一行十幾人喺台灣食得非常清淡,就算接受當地協會宴請,都會規定每人唔可以使超過三百五十元,費事被人話佢哋「食得太豪」。佢又透露,部分非常好客嘅協會成員曾經邀請議員們晚上出外觀光,但佢就認為呢啲應酬同公務無關,覺得都係可免則免,於是決定謝絕對方好意,改去書店打書釘,又話唔知其他議員有冇乘機出去觀光喎!

阿Paul又話上屆當佢仲係旅遊界功能界別議員時,國泰曾四度邀請佢出埠接收新飛機,但佢四次都決定唔去,自此之後都冇再收到國泰邀請喇!佢話既然自己當時係旅遊界代表,一定會接觸到同航空業有關嘅政策,為免瓜田李下,佢會一一回絕所有同類邀請。

雖然身處台灣嘅議員們堅持食得清淡,但其實有部分議員改機票玩多幾日,當中除咗有提早三日去金門觀光嘅團長馮檢基,仲有結束外訪後喺東京多留一日嘅梁耀忠,同埋多留五日去大阪同京都「探朋友」嘅長毛梁國雄。雖然私人旅程額外行程費用全數都由議員自理,但佢哋總算叫做賺咗張機票錢,唔知咁又會唔會好似其餘豪遊法國嘅同事咁,被人話佢哋違反指引呢?

第一手消息請下載on.cc東方互動iPhone/iPad/Android/Windows Phone Apps