回歸後的香港人，由很有獨特個性見稱的，變為「和稀泥」的持平兩面人。家陣，不論報章的社評、論壇的批判，甚至採訪路人甲乙丙意見，皆必須有正反兩方的觀點，才可出街，咁先至稱得上「中立」。現連學生考通識科問卷，都懂得將任何問題正反表述一次，不許有「既定立場」，最尾再歸納地「持平」、「中肯」、「不偏不倚」的總結一下，便包保合格過關。

在咁嘅環境長大的「精英」，一定會製造出「和諧社會」，將來，大眾可愉快生活，無死囉！

今日，為咗香港以後美好日子，我特意表演一下，如何寫一篇「公平公正」嘅中肯評論。

當香港市民一致聲討政府官員貪腐禍港之際，吖！一大棚立法會議員和行政會議成員竟不避嫌的大模廝樣接受航空公司款待，免費到法國「歐遊六天」，仲可以攜家眷同往。

喂！航空公司乃商業機構嚟嗰喎！會否有「利益輸送」o架！哦！有份去玩的何俊仁議員回應說：「過往立法會議員一直都有咁o架啦！」嗟！以前啲差佬有收黑錢啦！仲喺雜差房打人添！依家係乜時代呀？議員！

最景轟的，係航空公司回覆記者查詢時，說行程基於「個人私隱」未能透露詳情喎！真奇怪，啲議員去「考察」飛機博物館，同佢啲家眷有乜春關係呢？嗱！咁就讓議員們家眷知道「其家人」之工作多無聊，連九唔搭八嘅嘢也要應酬囉！

咁如果選出「觀光團」的代表人選？點解葉國謙、葛珮帆和鄭耀棠有份，但公民黨、街工的卻無份嘅？噢！「筆直」有限嘛！每人淨機票都成十萬嗰喎！總之，過咗唔好問啦！多事！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps