SUN搞作：少膽虫手記：冤魂索命
早幾日少膽虫留港過節，收工時發覺留低咗罐鞋油，於是折返壹全霉。點知喺門口居然見到有人燒衣紙，心中打個突。向來少膽嘅少膽虫為咗定驚，一路唱住：「盂蘭節氣魄更壯，盂蘭勝會心中不必驚慌！」一路戰戰兢兢行入大堂。只見大堂看更唔見咗，盞燈又眨吓眨吓；冷氣明明熄咗，但係仲凍過平時……
「腦～腫～你畀番條命我～～」
「媽咪呀！」少膽虫聽到把陰森鬼聲即時嚇到跪低，向四方叩拜：「有怪莫怪，少膽虫唔識世界！如有得罪，多多包涵呀！」
「腦～腫～我要你落嚟陪我～～」
「我唔係有心害你o架！」少膽虫爬到櫃台底，喊住咁話：「我害過咁多人，邊有可能次次都係有心o架？」
「腦～腫～我要你以後食飯兩千蚊冥幣一餐～～」少膽虫完全崩潰，正要向門外衝去，腳下一滑，就仆喺地上。
「咔嚓！咔嚓！」少膽虫突然被人包圍，個個拎住手機猛影。「喂！我唔係十九才子！」少膽虫一邊用廁紙擋一邊嗌。「腦腫！相機就係我哋條命！畀番部相機我哋！」少膽虫恍然大悟，原來係一班《爛果》攝記同事喺度「恭候」，想叫少膽虫唔好咁慳皮縮骨，用哀phone取代佢哋。「你唔落嚟攝影部睇吓，唔會知哀phone影相幾唔專業！枉我哋仲幫你食咁多官司！」
「已經唔係畀紙紮手機你喇喎。」少膽虫稍一沉思，運用腦腫級智慧，便解決此事：「真係唔得，咪改用三叔手機囉。」
