城中鏡：李思廉健康指標撐公司
內房股富力淨負債比率唔多靚仔，老闆李思廉四月嗰時都講過，公司嘅淨負債比率會升啲，尋日公布嘅中期業績，呢個比率已超過100%，嚇咗大家一跳。李總解釋，睇內地樓市前景睇得好好，所以買多咗地。佢仲教路，睇間公司健唔健康，唔應該只睇負債比率高唔高，有好多比率嘅計算方式亦都各有不同，而計算時間點都會好大影響，要睇數據就睇全年業績嗰啲會好啲喎！
李思廉話衡量一間公司做得好唔好，要睇好多比率。（資料圖片）
李總話，就好似人咁，好多量度人體健康指標嘅乜乜率、咩咩率，其實啲標準都已經係幾十年前所訂下，「依家啲人嘅壽命都唔同晒，以前啲人六十歲就瓜，依家起碼都八十歲啦！」佢又話有時亦係時間點問題，因為啲會計制度，要截數嘅時間咁啱嗰時比較高，啲公司有咁上下規模，有時負債係會高啲o架啦！
