城中鏡：百貨業工會反駁袁莎妮
香港總商會CEO袁莎妮日前放風，呻話包括零售業在內嘅多個本地服務業都出現人手短缺，要求政府考慮輸入服務業外勞。但香港百貨業僱員總會出聲明反駁總商會，話零售業出現職位空缺係因為僱主孤寒，搞到人才流失，仲鬧爆商界想藉輸入外勞欺壓本地打工仔添。
香港百貨業僱員總會反駁袁莎妮嘅言論。（資料圖片）
香港百貨業僱員總會尋日發表聲明，仲引埋政府統計處數據逐一擊破香港總商會嘅講法。僱員總會指出，○二至一二年呢十年嚟零售業勞動人口增加兩成三，仲高過整體勞動人口同期嘅百分之九升幅，好明顯零售業唔係無生力軍加入，只係人才流失。
僱員總會又引數據，指出零售業嘅工資指數喺○九年至今只係升咗百分之二咁大把，質疑如果真係勞工短缺，打工仔人工點會停滯不前。如果打工一族日做夜做，人工連通脹都追唔到，又難怪人哋要另謀高就嘅。僱員總會仲警告，如果連零售業都輸入外勞，一啲缺乏工作經驗嘅後生仔就會更難搵工咁話。
