城中鏡：鄧鳳賢擦20吋巨龍蝦
恒基地產營業部副總經理Anita鄧鳳賢做嘢向來夠搏，放暑期都要「斬件式旅行」，月前分三次去柏斯、首爾及拉斯維加斯，由於時間緊迫，每處只可留幾日，一於由朝玩到晚。
喺首爾魚市場睇見有半個人咁長嘅超巨龍蝦，鄧鳳賢話大開眼界。（受訪者提供）
先講柏斯，愛吃海鮮嘅Anita專登到訪漁人碼頭食好嘢，又參加品酒會，食到無停口。返到香港抖兩星期，再飛首爾，佢直奔當地最大魚市場，遇見長達二十吋超巨龍蝦，即時買嚟吩咐酒樓師傅白烚上碟，鮮味到極。食完龍蝦，再食埋醃生蟹，佢發現地道韓式醬汁醃成嘅凍蟹，香港絕對食唔到，同行友人興奮到打包幾隻上機，佢就買唔切，好後悔。填飽個肚後，有氣有力逛百貨公司，狂掃近期紅爆嘅蝸牛面膜，滿載而歸。
結束首爾之旅後，佢返香港抖兩周，又再出發去拉斯維加斯，撞正當地多個品牌大減價，一口氣掃入十多對高踭鞋，佢話抵到爛喎！
