政壇：搞搞政：真普聯倡公民提名 泛民高人潑冷水

呢位「高人」憶述，已故嘅白鴿黨元老司徒華曾喺九七回歸前發起過民間特首運動，希望攞到十萬個市民簽名支持佢做民間特首。當年華叔同協助佢嘅一班泛民盟友搞咗幾個月，幾經辛苦先搵到足夠提名，原因係香港人向來着重私隱，唔係求其話支持民主就肯畀啲個人資料同簽名你。

「高人」又話台灣係少數有奉行公民聯署制度嘅地方，當地嘅做法相當嚴謹，聯署人必須提供準確姓名、地址同身份證號碼，寫錯一隻字都會當無效，而且仲要提供埋身份證副本；其中親民黨嘅宋楚瑜，就曾因部分聯署被判無效而喪失參選總統資格，證明公民聯署並非如部分泛民想像中，有利少數黨或獨立人士參選。

對於有建制派批評公民聯署違反《基本法》，「高人」就建議大可扮晒大方咁接受公民聯署制度，但同時將聯署門檻定得略為高啲，例如要求最少有百分之三至五、即大約十萬至十七萬合資格選民聯署，而且仲要喺一、兩個月嘅提名期內取得，包保無一個泛民政黨可以做到。就算最後各泛民黨派肯團結一致，同心協力為某一位候選人搵到足夠聯署，呢位候選人亦肯定係中間溫和人士，只有少數選民支持嘅激進泛民同其他旨在攪局嘅「騎呢怪」，一定唔會入到閘。