政壇：辣招豁免慈善團體 官方企硬拒讓步
立法會十月復會後將繼續審議有「辣招」之稱嘅《二○一二年印花稅（修訂）條例草案》，由張炳良做局長嘅運輸及房屋局，尋日向立法會提交可分為五部分嘅修正案，包括豁免以重建為目的而收購物業嘅發展商繳交買家印花稅，但對於部分政黨建議要求豁免慈善團體同港人公司繳交買家印花稅，政府就繼續拒絕讓步。
張炳良繼續企硬，拒絕豁免慈善團體同港人公司繳交買家印花稅。（資料圖片）
慈善團體同港人公司繳交買家印花稅是否應該豁免，一直都有爭議，立法會負責審議有關草案嘅立法會委員會仍然未就呢啲問題拗掂數，所以暫時未知道草案幾時至再提交立法會通過成為法例。
今次政府提交嘅修正案內容，包括容許為重建目的而收購物業嘅發展商，喺攞到建築事務監督批准後，申請退回已經繳交咗嘅買家印花稅，同埋容許因為被市區重建局或政府強制收樓，而被迫出售物業嘅非香港永久性居民，等佢哋可以豁免繳交買家印花稅。
